Mar 9 | KKC | STEP | Yesuye dimapoo egeesee takaso, “Ayo nimapoo tei taka, odoo abo hamapoo hagee do, niba epedee talaime, esino daga malalo Godeeye wiligi doloso badalai beeame goo kitulugu sabolo siboga agalaiso.”

Mark 9

1 Yesuye dimapoo egeesee takaso, “Ayo nimapoo tei taka, odoo abo hamapoo hagee do, niba epedee talaime, esino daga malalo Godeeye wiligi doloso badalai beeame goo kitulugu sabolo siboga agalaiso.”

Yesu o su mudu opusomodi

(Mat 17:1-8, Luka 9:28-36)

2 Osoloso beeame 6 olo pogoloso, hamamee Yesuye Pita, Yemes, osoloso Yonee esee mubi hoo dokodoo odoo mauwe mapoo ido paladeeso. Mubi hoo dokodoo o hamamee dili odoo oso balagamolome Yesu o su mudu opusomo paso. 3 Eseme egeino Yesu o dugo dia hohodi ka heliye amaga poni oso howo dooso. Esiga mi hamapoo odoo heeso dugo hapooga dugo heliye egesi molo agalaime. 4 Osoloso Ilaisa dio Mosesee dio galaga sibileso Yesubolo to kemeleeso.

5 Pitaye Yesu mapoo egeesee takaso, “Eligili odoo, iba hamapoo dabalai tekepo. Esiga iyo waseme bakadio hedepedi tegegalaiso, hee nee, hee Moseseeyo, osoloso hee Ilaisayo.” 6 Pitaye takalai kibiya gooleedele, diba obume.

7 Eseme kolobo sibileso, diba gidisooso. Osoloso kolobo maga toso egeesee takaso, “Hagee medee ayo gooma mo holo, esiga o to medee dui.”

8 Eseme Pita, Yonee, osoloso Yemes to taka duloso egegeino, Mosesee dio Ilaisa dio mena, esino hedepe Yesu dibolo badoboome egeiso.

9 Osoloso diba mubi dokodooga see kumoo moulone, Yesuye dimapoo kitulugu sabolo takaso, “Epedee niyo egei goo odoo hee mapoo na takee. Esino Odoo Holo, a toloso hogabia ogoloso, hamamee odoo hee mapoo ka takee,” diso. 10 Eseme Yesuye to taka diayo wulo kookoodooso. Esino diayo Yesu toloso hogabia goo eyo bei disono nei woosa nei woosa demeleeso.

11 Osoloso diayo Yesu mapoo woosaso, “Bei kasimaga tei eligili odoo oso takolone, daga Ilaisa sibileso, Keliso hamamee sibileigo dee ka takeliyo?”

12 Eseme Yesuye to nei dimapoo egeesee takaso, “O, daga Ilaisa sibileso eli medee moodoolaiso. Godeeyo to booka mapoo hogugu moloso, ‘Odoo Holo, a dala toowa talaiso, osoloso edebeeyo a gowoolaiso.’ 13 Esiga ayo nimapoo taka, Ilaisa yo olo simiso. Osoloso edebeeyo yo dala teneeso, bei Godeeyo to booka maga taka ee dodolone.”

Yesuye giso holo bo holo pala moodoo

(Mat 17:14-21)

14 Yesuye o hamamee dili odoo bakadio hedepedi mubi dokodoo paladee sabolo, see kumoo meileso egeino, Yesu o hamamee dili odoo abo tei eligili odoo sabolo agadiga molome egeiso. Eseme odoo susuga sibileso mooloogoodooso. 15 Diba disono mooloogoodoloso balagameleeno, Yesu dimapoo simi ogoloso, dia howoogaso. Eseme diba Yesu mapoo goomoga sabolo hogugo diadeeso.

16 Eseme Yesuye dimapoo woosaso, “Niba ogoo goo maga agadiga malala?” diso.

17 Osoloso mooloogoodoo ee ma kuloduga odoo heeso egeesee takaso, “Eligili odoo, mo holo bo holo pala oso ibaya paga, nayo moodoolame ido simino, no hamapoo mena. 18 Esiga bo holo yimapoo poologa, yo miyomoo homodobuloso, kakawa molone o mei wulo tekeliso, osoloso maga maga makawo tiodiliso. Esino nee hamamee dili odoo dimapoo mo holo bo holo peegoo hasuso pigilame woosano, diayo bo holo peegoo hasuso pigile, bei diayo kitulugu tebilena.”

19 Eseme Yesuye dimapoo egeesee takaso, “Niba tei too mauwe odoo. A beeame sage kasolo badoga niyo amapoo tei ka talaiyo? Osoloso niyo amapoo tei koo toga, a nimapoo dia gowoo. Esino giso holo amapoo ido sibe,” diso.

20 Eseme diayo giso holo Yesu mapoo ido simiso. Esino bo holo eyo Yesu egeme, giso holo yo bo holoso o kulodu degiga meleso miyomoo homodobiaso. Eseme maga mapoo makawo oudoo sabolo mi mapoo bidigamo siliso.

21 Yesuye holopeyo oma mapoo egeesee woosaso, “Goo hagee kobolone holope yimapoo ka mimooloogoowo?”

Eseme holopeyo amameeye nei Yesu mapoo egeesee takaso, “Yo pepoko mapoo mimooloogoo. 22 Beeame susuga bo holoso holope wolomalame yo dou mapoo toodoo, osoloso howomoo huso demeleeso. Esiga no kitulugu tebia mologa, nayo iba sooloo dele, osoloso iba pidi,” diso.

23 Eseme Yesuye yimapoo egeesee takaso, “Nayo taka, ‘No kitulugu tebia daga iba pidi,’ diso. Esino edebeeyo amapoo tei toga, bi susuga haga kalawanee.”

24 Osoloso holopeyo amameeye Yesu mapoo to neligi egeesee takaso, “A namapoo tei tooso, esino nayo a pidi, mo tei too pepoko see toowa dee,” diso.

25 Eseme odoo susuga Yesu mapoo saga mooloogoodalame sibadee egeme, Yesuye bo holo mapoo neligi egeesee takaso, “No odoo mapoo dulu taba ibaya teneli. Esiga ayo namapoo to kitulugu sabolo ka taka, no epedee holope hageeyo kuloduga peegoo gasiboga, see holope hageeyo kulodu na gadi.”

26 Osoloso bo holo gwa sabolo dia degiga meleso holope miyomoo togobuloso, yo peegoo gadiso. Eseme holope mi mapoo degigilega kakawoloso meleeso. Eseme odoo aboso yo olo ta gooleeso. 27 Esino Yesuye holopeyo dee mapoo toloso, yo tabalame pidiso. Eseme holope yo tabaso.

28 Osoloso Yesu o hamamee dili odoo sabolo dibusomo moso kulodu dopolone, diayo Yesu mapoo mada woosaso, “Bei kasimaga bo holo peegoo hasuso pigilei kitulugu imapoo mauwe ka molosomo?”

29 Eseme Yesuye to nei egeesee takaso, “Niyo daga dokodoo toodagooga, bo holo egesi masi peegoo ka hasuso pigiya.” diso.

Yesu eyo talai goo see taka

(Mat 17:22-23, Luka 9:44-45)

30 Yesu o hamamee dili odoo sabolo mi hee egee pogoloso, see Gelili mi ee ma kuloduga diso. Osoloso Yesu yo goomogele odoo heeso yo egeyaga, 31 bei, Yesu o hamamee dili odoo eligi meleeso. Yayo dimapoo egeesee takaso, “Odoo Holo, a amapoo ha teli odoo mapoo tenelame tiasalaiso. Osoloso diayo a wolomalaiso, esino beeame bakadio hedepedi eyo kulodu ta maga a see hogabileiso.” 32 Esino diayo Yesuye taka to eyo bei medee kibiya gooleedele. Eseme diba obume Yesu mapoo to eyo bei see wosele.

Odoo agayo wiligi doloso ka badalaiyo?

(Mat 18:1-5, Luka 9:46-48)

33 Yesu o hamamee dili odoo sabolo Kapeniyum mi mapoo peledabaso. Osoloso diba moso diso dabalai mapoo debeiso. Osoloso Yesu o hamamee dili odoo mapoo woosaso, “Niba eli domo abaga sibulone ogoo goo boowomo simiyo?” 34 Esino diayo to nei wedi dile, bei, diayo dibada kulodu odoo agayo wiligi doloso badalai goo maga to boowaso.

35 Yesu yo biamolone o hamamee dili odoo gilimadoloso, dimapoo egeesee takaso, “Edebeeyo malalo wiligi doloso badalai gooleega, yo eyo pepookodee, osoloso odoo susuga wulo wulayo pidi.”

36 Yesuye holope ido sibileso, dibada mudugiyo tebidiso. Osoloso holope Yesuye maduloso dimapoo egeesee takaso, 37 “Edebeeyo mo hu maga holope hageesi pidiga, yo a pidi masi pidiso. Osoloso edebeeyo a pidiga, yo moma a diye di pidi masi pidiso.”

Odoo imapoo ha koo teli, diba ibada odoo

(Luka 9:49-50)

38 Yoneeye Yesu mapoo egeesee takaso, “Eligili odoo, iyo odoo hee nee hu maga bo holo peegoo hasisamo silime egeiso. Eseme koodobilame iyo yimapoo takaso, bei yo ibolo hodobo mooloogoodoo hedepenee.”

39 Eseme Yesuye egeesee takaso, “Na hamaga takee. Odoo heeso mo hu maga goo mudu opusomodi moodooga, yayo mo hu mapoo tokenee goo saga takalaime. 40 Osoloso odoo imapoo ha koo teli, diba ibada odoo.” 41 Yesuye egeesee takaso, “Ayo nimapoo tei goo hee taka, bei niba Kelisowo odooga, odoo heeso nimapoo howo keeneega, yo hamamee Godeeye nei tenelaiso.”

Tokenee goo talame kukuli

(Mat 18:6-9, Luka 17:1-2)

42 Eseme Yesuye o hamamee dili odoo dimapoo egeeesee takaso, “Odoo heeso amapoo tei too odoo tokenee mapoo gido dilame gooleega, daga odoo aboso yimapoo sibileso, diayo o mu mapoo yo toowa bagagoloso howo bou mapoo toosoga, odoo egee dala pepoko toloso talaiso. Esino odoo yayo amapoo tei too pepoko odoo ee tokenee mapoo gido dileso, tokenee toga, edebeeyo tokenee mapoo gido dili odoo ee takelega poogooga, Godeeye yimapoo nei dala toowa tenelaiso. 43 Osoloso nee dee hodio oso no tokenee mapoo gido duga, dee hodio egee kobigi, dee hediliweso badoboso kookaiyo gie badeli talai soowa. Osoloso nee dee bakadio sabolo dou mapoo dilei tekeponee, bei dou egee koo semili. 44 ^{▼▼9:44 sabolo 9:46 sabolo Makaye hamapoo hogugule. Esino 48 maga taka to hedepe.} 45 Osoloso nee homo hodio oso no tokenee mapoo gido duga, homo hodio egee kobigi, homo hediliweso badoboso kookaiyo gie badeli talai soowa. Osoloso nee homo bakadio sabolo dou mapoo dilei tekeponee. 47 Osoloso nee howo hodio oso no tokenee mapoo gido duga, nee howo hodio egee tapigi. Godeeye wiligi doloso badeli omapoo howo hediliwe gadilei soowa. Esino howo bakadio sabolo dou mapoo toodalai tekeponee. 48 Bei mi omapoo

‘boobee egee molo koo wedili osoloso dou koo semili.’
49 Esiga odoo susuga dala toga douso gawe masi gawoolaiso, bei Godeeye goomoga iba medee tekepo dabalame.”

50 “Solu hadali bi medee tekepo. Esino solu hadali mauwe poogooga, hadali see talaisomo? Haye, see talaime. Esiga niba solu masi molone nemegei dimapoo mesie sabolo deebee.”